လါစဲးပထ့ဘၢၣ် ၆သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပူၤ အထက ၁ ကၠိအဃၢၢ် ဖဲလါစဲးပထ့ဘၢၣ် ၅သီ မုၣ်ထူၣ်ဆၢကတီၢ် တဲဝဲဒြိယူၤလၢကၠိကရၢၤပူၤအဃိ မၤအါထီၣ်ဘံၣ်ဘၢသုးဖိနီၢ်ဂံၢ်န့ၣ် သ့ၣ်ညါဘၣ်လၢကၠိဖိမိ/ပါတဖၣ်အိၣ်န့ၣ်လီၤ
ဖဲလါစဲးပထ့ဘၢၣ် ၆သီ ဂီၤခီဆၢကတီၢ် တၢ်ပံးကၠိတအိၣ်နာ်က့ တၢ်ခးလိာ်သးမ့ကဲထီၣ်တမံၤမံၤန့ၣ်ဘၣ်ယိၤဝဲကျဲကကးတံၢ်သးဒီးဖဲလဲၤအိၣ်က့ၤကၠိဖိဆၢကတီၢ် တၢ်နုာ်လီၤဟးထီၣ်အလီၢ်တဖၣ်ကတံၢ်အဃိ တလဲၤဆှၢဆူကၠိအဂ့ၤန့ၣ် ကၠိဖိမိ/ပါတဂၤစံးဝဲလီၤ
“ဖဲမဟါ လၢကၠိပူၤပှၤသုးဖိဟဲအါမးလီၤ ပတပျဲလဲၤဖိသၣ်လၢၤဘၣ် ကမ့ၢ်သုးဖိဟံန့ၣ်ဘံၣ်ဘၢလီၤ ယဖိမုၢ်တဲဝဲလၢကၠိဒြိဟဲအဃိ ပသၤကိာ်လၢပလဲၤအိၣ်ကၠိတန့ၣ်ကျဲကပံးသးအဃိ ပတပျဲလဲၤကၠိဘၣ်”န့ၣ်အဝဲစံးဝဲလီၤ
ဒြိဟဲတဟဲတသ့ၣ်ညါလီၤတံၢ်နာ်က့ ကၠိကရၢၢ်ပူၤပယီၤသုးဟံးန့ၣ်ဃးဘံၣ်ဘၢဒီးတၢ်ဒုးမ့ကဲထီၣ်လၢမၠၣ်ဝတံၣ်ဝ့ၢ်ပူၤနာ်က့ မိ/ပါမ့လဲၤကိးက့ၤဖိသၣ် တပျဲက့ၤဝဲဆူဟံၣ်န့ၣ်မၠၣ်ဝတံၣ်ဝ့ၢ်လီၢ်ကဝီၤပိၣ်မုာ်တဂၤစံးဝဲန့ၣ်လီၤ
“ဖဲမဟါယဖိဒိၣ်မုၣ်ကၠိပျာ်ဝံၤဟဲက့ၤတဲဝဲ လၢကၠိန့ၣ်ပှၤသုးဖိအိၣ်ခိးတၢ်လီၤ တဂီၤအံၤပှၤကၠိဖိတထီၣ်ကၠိဘၣ် ကၠိန့ၣ်တပံးဘၣ် လၢအကိပူၤမနုကဲထီၣ်လဲၣ်န့ၣ်တသ့ၣ်ညါဘၣ် တဂီၤအံၤကၠိဖိမိ/ပါတဆှၢကၠိဖိဆူကၠိဘၣ် ဘၣ်ကိၢ်ဘၣ်ဂီၤမီနီ”န့ၣ်အဝဲစံးဝဲလီၤ
ဘၣ်ဃးဒီးတၤမၤအါထီၣ်သုးဘံၣ်ဘၢဂံၢ်ဘါအံၤခီဖျိလၢပျံၤဝဲဒြိကဟဲဒီး တနံၤအံၤလါစဲးပထ့ဘၢၣ် ၆သီ ဂီၤခီဆၢကတီၢ်နာ်က့ ပှၤထီၣ်ကၠိနီၢ်ဂံၢ်ဆှၤန့ၣ်ပှၤဘူးဒီးကၠိတဂၤစံးဝဲန့ၣ်လီၤ
တကးဒံးဘၣ် မၠၣ်ဝတံၣ် ဝ့ၢ်ပယီၤသုးစုဖီလာ် ဝဲၤကျိၤဝဲၤဒၢးပှၤမၤတၢ်ဖိ၊ဒူၣ်ဖိထၢဖိတဖၣ် ဒီးပှၤအိၣ်ဘူးဖဲ ရူကပၤတဖၣ်ဒ်သိးကဆီတလဲအလီၢ်အဂီၤ Federal Wingsဒြိကရူၢ်ထုးထီၣ်တၢ်ပရၢန့ၣ်လီၤ
ဖဲအပူၤကွံာ် ဖဲလါစဲးပထ့ဘၢၣ် ၃သီ အနံၤမၠၣ်ဝတံၣ်ပၢၤကီၢ်ရူဒီး ပၢပြးရူဘၣ်တၢ်ခးလီၤမ့ၣ်ပိၢ်ဒီးဒြိအဃိပယီၤသုးပဒိၣ်တဖၣ်ဒီးပှၤအဂုၤအဂၤသံ၆ဂၤဒီးဘၣ်ဒိအါမးန့ၣ်သ့ၣ်ညါဘၣ်န့ၣ်လီၤ
ကညီကီၢ်စဲၣ်လီၢ်ကဝီၤတဖၣ်အပူၤ တကီၢ်ခါခဲအံၤ လါယူၤလံ၊လါအီကူး ဒီးလါစဲးပထ့ဘၢၣ်အတီၢ်ပူၤ ကီၢ်ဆၣ်တဖၢ်အပူၤ ပယီၤသုးဟံန့ၣ်ဃးတၢ်လီၢ်တဖၣ်ဝဲၤကျိၤဝဲၤဒၢးရူတဖၣ်ပယီၤသုးသိလ့ၣ်ကျိၤတဖၣ်ဘၣ်တၢ်ခးအီၤသတူာ်ကလၤဘၣ်တၢ်တ့ၢ်လီၤမ့ၣ်ပိၢ်ဒီးဒြိသ့ၣ်တဖၣ်တပယူာ်ဃီန့ၣ်KNLAသုးပာ်ဖှိၣ်တဖၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ