လါစဲးပထ့ဘၢၣ် ၁သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်အဃၢၢ် လဲးခဲးတီၣ်အဃၢၢ် ပယီၤသုးမီၤစိရိၤခးလီၤကျိဖးဒိၣ်န့ၣ်မၠၣ်ဝတံၣ်ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ
လဲးခဲးတီၣ်ဖီခိၣ် ပယီၤသုးစုတီၤဖီလာ် BGFသုးကလၢၤ အံၤ KNLAသုးပာ်ဖှိၣ်တဖၣ်ထီၣ်ဟံန့ၣ်ဝဲယံၤထီၣ်တလါဘျဲၣ်လံဒီးပယီၤသုးတကပၤမၤက့ၤတၢ်ထီၣ်ဒုးအိၣ်ထီၣ်အဘျီ၁၀ဘျဲၣ်လံန့ၣ် Cobra Columnထုးထီၣ်ရၤလီၤတၢ်ကစီၣ်န့ၣ်လီၤ
ဖဲအပူၤကွံာ်လါအီကူး ၁၅သီအနံၤခါနာ်က့ လဲးခဲးတီၣ်အဃၢၢ်တၢ်ဒုးလၢကဲထီၣ်ဒီးတၢ်ဒုးအပူၤပယီၤသုးဒီးပယီၤသုးစုတီၤဖီလာ် BGFသုးတဖၣ်ဘၣ်ဒိသံအါဝံၤ တၢ်ဒုးကဲထီၣ်တအိၣ်န့ၣ် အိၣ်ခံနွံဘျဲၣ်လံန့ၣ်သ့ၣ်ညါဘၣ်န့ၣ်လီၤ
တၢ်ဒုးကဲထီၣ်တအိၣ်နာ်က့ ဖဲအပူၤကွာ်လါအီကူး၃၁သီ မုၢ်နၤခီ၉နၣ်ရံၣ်ဃၣ်ဃၣ်ဆၢကတီၢ် ပယီၤသုးစုဖီလာ် ခလရ၂၇၅သုးခးလီၤကျိဖးဒိၣ်ဆူလဲးခဲးတီၣ်တကပၤန့ၣ်မၠၣ်ဝတံၣ်လီၢ်ကဝီၤဖိစံးဝဲန့ၣ်လီၤ
“စးထီၣ်ခးဝဲဖဲ၉နၣ်ရံၣ်လီၤ ကျိဖးဒိၣ်ကျိဖိခးဝဲလီၤ ခးဝဲတပယူာ်ဃီလီၤ ပနၣ်ဟူဘၣ်အကလုာ်သီၣ်ဖးဒိၣ်လီၤ”န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
တကီၢ်ခါခဲအံၤ လဲးခဲးတီၣ်အဃၢၢ်တၢ်ဒုးဂၢၢ်နာ်က့ပယီၤသုးတကပၤခးလီၤကျိဖးဒိၣ်ဒီးတ့ၤလီၤမ့ၣ်ပိၢ်ဒြိကိးမုၢ်နံၤဃၣ်ဃၣ်န့ၣ်သုးခိၣ်ဒးဘီစံးဝဲလီၤ
“မုၢ်နၤခီန့ၣ်ခးဝဲကိးမုၢ်နၤလီၤ အဝဲသ့ၣ်ခးစိလီၤဝဲဒီးကျိဖးဒိၣ်လၢမုၢ်နၤခီလီၤ ဟဲခးလီၤဝဲဒီးဒြိအိၣ်တအါဘၣ် အဘျီ၁၀ /၁၅ဘျီဃၣ်ဃၣ်လီၤ”အဝဲစံးဝဲလီၤ
ပယီၤသုတကပၤခးလီၤကျိဖးဒိၣ်ဟဲခးလီၤမ့ၣ်ပိၢ်ဒီးကဘီယူၤဆူ လဲးခဲးတီၣ်တပယူာ်ဃီဒီးခိဖျိခးလီၤတၢ်ဒ်န့ၣ်အဃိ လဲးခဲးတီၣ်ဖီခိၣ်တၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤအိၣ်အါမးန့ၣ် Cobra Columnထုးထီၣ်ရၤလီၤတၢ်ကစီၣ်န့ၣ်လီၤ