လါအီကူး ၂၃သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ကဝီၤဒ့၄ပူၤ မၠၣ်ဝတံၣ်ဝ့ၢ် ကီၢ်ရ့ၣ်တၢ်ဆါဟံၣ်ဖးဒိၣ်ဘၣ်တၢ်ခးအီန့ၣ် မၠၣ်ဝဝံာ်ဝ့ၢ်လီၢ်ကဝီၤဖိစံးဝဲန့ၣ်လီၤ
ဖဲလါအီကူး၂၂သီ မုၢ်နၤခီ ၈နၣ်ရံၣ်မံနံး ၂၀ဃၣ်ဃၣ်ဆၢကတီၢ် မၠၣ်ဝတံၣ်ဝ့ၢ် ကီၢ်ရ့ၣ်တၢ်ဆါဟံၣ်ဖးဒိၣ်ဘၣ်တၢ်ခးလီၤမ့ၣ်ပိၣ်ဒီးဒြိဝံၤခီဖျိဘၣ်တၢ်ခးဒ်အံၤဝံၤအလီၢ်ခံ တၢ်ဆါဟံၣ်ပူၤတၢ်သူၣ်ထီၣ်ဟးဂီၤတနီနာ်က့ ပှၤကညီဘၣ်ဒိတအိၣ်န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
“တမ့ၢ်မ့ၣ်ပိၢ်ဘၣ် အိၣ်လီၤတဲၤလၢတၢ်ဖီခိၣ် အဝဲသ့ၣ်ဖးခံဆီ လၢအီးစံၣ်ဂၠ့ၣ်တၢ်သူၣ်ထီၣ်ကပၤ လီၤဖဲတၢ်ဟးလီၢ်လၢပှၤတသူလၢၤတဖျၢၣ်တကပၤ ပှၤကညီတဘၣ်နီတမံၤဘၣ် လၢတၢ်ဆါဟံၣ်တၢ်ဟးလီၢ်ဖိခိၣ်တဖျၢၣ် လီၤတဲၤဖဲအကပၤတၢ်သူၣ်ထီၣ်လၢပှၤကညီတအိၣ်လၢၤတဖျၢၣ်လီၤ”န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
တကးဒံးဘၣ်မ့ၣ်ပိၢ်လီၤတဲၤဖဲ ကၣ်စတၣ်ရူကပၤတဖျၢၣ်ဒံးန့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
မၠၣ်ဝတံၣ်ဝ့ၢ်အဃၢၢ်လဲးခဲးတီၣ်ဖီခိၣ် ပယီၤသုးဒီးKNLAသုးပာ်ဖှိၣ်တဖၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်အိၣ်တလါဘျဲၣ်လံဒီးဖဲလါအီကူး၂၂သီမုၢ်နၤခီ ၇နၣ်ရံၣ်ဆၢကတီၢ်ပယီၤသုးတဖၣ်ခးလီၤကျိဖးဒိၣ်ဆူ လဲးခဲးတီၣ်တကပၤန့ၣ်မၠၣ်ဝဝံၣ်ဝ့ၢ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“စးထီၣ်ခးဝဲလၢမုၢ်နၤခီ ၇နၣ်ရံၣ်ဃၣ်ဃၣ်န့ၣ်လီၤ ခးကျိဖးဒိၣ်လီၤ ပတုာ်ဖဲမုၢ်နၤခီအနၣ်ရံၣ်၁၀ဘျဲၣ်လီၤ ခးဝဲထဲအဖျၢၣ်ဒိၣ်လီၤ အိၣ်ခးဝဲလၢ၂၇၅တကပၤလီၤ”န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲလီၤ
ကညီကီၢ်စဲၣ်ပူၤလီၢ်ကဝီၤတဖၣ်လၢအမ့ၢ်ဝဲ မၠၣ်ဝဝံၣ်၊ကီးတရံး၊ကြူၤတုၤ၊နိၣ်တကီ၊ဖၣ်ပူၣ်ဒီးသၣ်တီၣ်ဝ့ၢ်တဖၣ်တကပၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခ့ခီခံကပၤထံၣ်လိာ်သးတၢ်ဒုးကဲထီၣ်တပယူာ်ဃီဒီးပယီၤသုးစုဖီလာ်ဝဲၤကျိၤဝဲၤဒၢးတဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီန့ၣ်သ့ၣ်ညါဘၣ်ခီဖျိလီၢ်ကဝီၤတၢ်ကစီၣ်တဖၣ်စံးဝဲအသိးန့ၣ်လီၤ