လါယူၤလံ ၂၅သီ၊၂၀၂၃နံၣ်
ကညီကီၢ်စဲၣ် နိၣ်တကီကီၢ်ဆၣ် ချၢၣ်-တကူၣ်တၢၣ်သဝီကရူၢ်ပူၤ ပယီၤသုးမီၤစိရိၤဆီလီၤလီၢ် တကူၣ်တၢၣ် ပၢၤကီၢ်ဝဲၤဒၢး ဘၣ်တၢ်ခးလီၤမ့ၣ်ပိၢ်ဒီးဒြိတပယူၤဃီန့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ
စးထီၣ်ဖဲလါယူၤ ၁၁သီတုၤ ၁၇သီ အတီၢ်ပူၤ အနိၣ်တကီကီၢ်ဆၣ် ည့ချဲမၠ့ၣ်(စ့းတးသုးခးသီခါဖၠၣ် )ကစၢၢ်ခိၣ် ပယီၤသုးကျိၤလၢဟဲထီၣ်မၤတၢ်ဒုးသုးတဖၣ်ဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ဝံၤအလီၢ်ခံ တကူၣ်တၢၣ်ပၢၤကီၢ်ဝဲၤဒၢးတကပၤ နၣ်ဟူဘၣ်ပှၤဟဲခးလီၤမ့ၣ်ပိၢ်ဒီးဒြိတပယူၤဃီန့ၣ် ဟီၣ်ကဝီၤပိာ်ခွါတဂၤစံးဝဲလီၤ
“မ့ခးဝဲဆူ ဝဲၤဒၢးတကပၤန့ၣ် ပနၣ်ဟူဘၣ်လၢဒဲၣ်လိး၊ကမီးဝဲ တကပၤလီၤ လဲၤခးလီၤဝဲဆူပၢၤကီၢ်ဝဲၤဒၢးလီၤ ည့ချဲမၠ့ၣ်တကပၤနာ်က့ခးဝဲလီၤ ဟဲခးဝဲဒီးဒြိိအိၣ်၅ဝီလံ လၢ၂၁သီအနံၤနာ်က့ ပှၤကညီတကပၤဟဲခးလီၤ၃ဘျီဆူပၢၤကီၢ်ဝဲၤဒၢးတကပၤလီၤ”န့ၣ်ဖဲလါယူၤ ၂၄သီအနံၤအဝဲစံးဝဲဒၣ်လီၤ
တကးဒံးဘၣ် နၣ်ဟူတၢ်သီၣ်လၢပၢၤကီၢ်ဝဲၤဒၢးတကပၤနာ်က့ ပှၤတလဲၤဆူဝဲၤဒၢးအဃိတဲလီၤတံာ်တၢ်အိၣ်သးတန့ၣ်ဒံးဘၣ်န့ၣ် ဟီၣ်ကဝီၤပိာ်ခွါတဂၤစံးဝဲလီၤ
“ပနၣ်ဟူတၢ်သီၣ်တဘီ တဘီနာ်က့တသ့ၣ်ညါဘၣ်မတၤဟဲခးမတၤလဲၤန့ၣ် ဖဲတၢ်လီၢ်အဃၢၢ်ဝဲန့ၣ်ပှၤတလဲၤနီတဂၤ ပှၤတအိၣ်နီတဂၤန့ၣ်ယံၤလံ ဆိမိၣ်န့ၣ်လၢဝဲၤဒၢးကပၤလီၤတဲလီၤတံာ်တသ့ဘၣ် ပှၤလဲၤတဘူၣ်ပှၤလဲၤတအိၣ်နီတဂၤအဃိ”န့ၣ်အဝဲစံးဝဲလီၤ
ပယီၤသုးမီၤစိရိၤအသုးကလၢၤဝဲၤဒၢးတဖၣ်ဘၣ်တၢ်ခးအီအဖီခိၣ် ဖှီၣ်စုကဝဲၤကရူၢ်ကရၢတဖၣ်တထုးထီၣ်လံာ်သနာ်က့ ချၢၣ်-တကူၣ်တၢၣ်သဝီကရူၢ်ပူၤ ဟံးန့ၣ်ဃးဟီၣ်ကဝီၤတၢ်ဒိၣ်စိဒီးပယီၤသုးမီၤစိရိၤတကပၤခးလီၤကျိဖးဒိၣ်ဆူသဝီတဖၣ်အိၣ်န့ၣ် နဂနံၣ်သုးကျိၤ သုးကျိၤခိၣ်ခံ Ko Hein စံးဝဲလီၤ
“ပယီၤသုးမီၤစိရိၤတကပၤ အိၣ်ခးလီၤ ၁၂၂မမ ဟီၣ်ဝ့ၣ်စၣ် ဆူ သဝီတဖၣ်တပၤတဘျီတဘျီလီၤ ဟီၣ်ကဝီၤတၢ်ဒိၣ်စိပမၤန့ၣ်ဃးလီၤ”န့ၣ်အဝဲစံးလီၤ
တၢ်ဒုးကဲထီၣ်လၢ ပယီၤသုးမီၤစိရိၤဒီးဟီၣ်ကဝီၤတၢ်ပၢၢ်ဆၢပာ်ဖှိၣ်သုးတဖၣ်အဘၢၣ်စၢၤဒီး ပယီၤသုးတကပၤခးလီၤကျိဖးဒိၣ်အဃိ ပလ့ၣ်၊ချၢၣ်-တကူၣ်တၢၣ်သဝီပူၤ ဟီၣ်ကဝီၤကမျၢၢ်၂၀၀၀ဘျဲၣ်အံၤ ဘၣ်လဲၤဃ့ၣ်စံၣ်အိၣ်ဆူ ကပၤသဝီတဖၣ်ဒီး တနီတၢ်ဒုးမ့ၢ်ဂၢၢ်တစိၤတလီၢ်န့ၣ် ဟဲက့ၤအိၣ်ဆိးဝဲလၢသဝီပူၤန့ၣ်ဟီၣ်ကဝီၤဖိစံးဝဲလီၤ
ကညီကီၢ်စဲၣ်ဒီးတလၢၤကီၢ်စဲၣ်ပူၤပယီၤသုးမီၤစိရိၤသုးကလၢၤ၊ပယီၤသုးမီၤစိရိၤပၢၤကီၢ်ဝဲၤဒၢး၊တၢ်သမံသမိးတြဲၤဒီးပယီၤသုးစုဖီလာ် ရူတဖၣ်ဘၣ်တၢ်ခးလီၤဒီးဒြိတယူၤဃီဒီး ဖဲလါယူၤ ၁၄သီအနံၤမုၣ်ထူၣ် ၁၂နၣ်ရံၣ်ဃၣ်ဃၣ်ဆၢကတီၢ် နာ်က့ တလၢၤကီၢ်စဲၣ် ကၠ့းမရီပၢၤကီၢ်ဝဲၤဒၢးဘၣ်တၢ်ခးလီၤမ့ၣ်ပိၢ်ဒီးဒြိအဃိ ပယီၤသုးသံသၢဂၤဘၣ်ဒိခံဂၤန့ၣ် သ့ၣ်ညါဘၣ်ခီဖျိနဂနံၣ်သုးကျိၤထုးထီၣ်တၢ်ပရၢအသိးန့ၣ်လီၤ
